KUCHING: Program Ora Et Labora Run Renggat Keenam mujur ngumpul belanja ti deka diberi ngagai nembiak Ruang Bilik Sekula St Joseph.
Nya mungkur nembiak ari Sekula Sekondari (SMK) St Joseph, Sekula Peribit St Jospeh enggau Sekula Antarabansa St Joseph.
Program belanda bepelasar rambai jaku I Run of St Joseph’s nya diatur Gerempung Josephian Lama (OJA) Kuching dipasuk 1,300 orang nyengkaum nembiak enggau ex-nembiak Ruang Bilik Sekula St Joseph.
Presiden OJA, Datuk Seri Prof Dr Sim Kui Hian madah, Ruang Bilik Sekula St Joseph nya chukup nyelai laban semina bisi ditumbuh ba Sarawak.
“Kitai udah numbuhka SMK St Joseph nyadi sebuah sekula dibantu perintah lalu Sekula Peribit St Joseph enggau Sekula Antarabansa St Joseph endang sekula peribit.
“Ketetiga sekula tu begumpul sereta bela ngambi bagi ba bemacham aktiviti diatur begulai,” ku iya.
Dr Sim mansutka jaku nya rambau bejadi Program Ora Et Labora Run Renggat Ke-6 kena 7 Oktober tu tadi.
Iya ti mega Menteri Pengerai Mensia Mayuh, Pengawa Berumah enggau Perintah Lokal temegah ati meda ketetiga sekula nya begulai ba Program Lumba Nurun Ke Sekula sereta ngambi bagi ba program belanda nya ba hari siti.
“Pekara tu mandangka integrasyen ti tegap ruang bilik Josephian entara ketetiga sekula tu lalu Program Ora Et Labora Run tu deka terus diatur dudi hari.
“Nya alai, semua rayat sekali ke nembiak tauka ruang bilik sida, pengajar enggau pinchin pengajar, ex-nembiak enggau mensia mayuh patut terus meri sukung ngagai program baka tu.
“Kebuah pia laban tu meh pelasar dikena kitai semua begempuru sereta begulai baru enggau pangan diri,” ku iya.